ตทา เสนาปติ เอตฺถ, ปจฺจนฺเต กุปิเต คโต;
อาณาเปตฺวาน ตํ ราชา, ยุชฺฌนตฺถาย เปสยิฯ
[44]
หโต เสนาปติ ตตฺถ, ยุชฺฌิ น รเณ มโต;
กกูฏาทีนิ อาทาย, ราชา โส โรหณํ อคาฯ
[45]
คนฺตฺวา โจฬพลํ ตตฺถ, อลภิตฺวา ปเวสนํ;
นิวตฺติตฺวา สกํ รฏฺฐํ, อคมาสิ อิธตา ภยาฯ
[46]
ตโต เสนาปติฏฺฐาเน, วิทุรคฺคํ ตุ นายกํ;
ฐเปสิ ราชา ลํกินฺโท, เตชวนฺตํ มหามติํฯ
[47]
ปจฺจนฺตํ โจฬราชสฺส, ฆาเตตฺวา โส จมูปติ;
อาณาเปสิ อิโต นีตํ, ทสฺเสตฺวาน วิภีสิตํฯ
[48]
ตโต ทาเปสิ โส สพฺพ-ปริกฺขารํ มหารหํ;
ปํสุกูลิกภิกฺขูนํ, สพฺเพสํ ทีปวาสินํฯ
[49]
มหาวิหาเร ลํกินฺโท, ปฏิพิมฺพสฺส สตฺถุโน;
ชลนฺตํ มณิรํสีหิ, อกา จูฬามณิํ ตทาฯ
[50]
โอโรธา วิทุรา ตสฺส, ปาทชาเลน ปูชยิ;
มณีหิ ปชฺชลนฺเตหิ, ปฏิมํ ตํ สิลามยํฯ
[51]
ฌาปิตํ โจฬราชสฺส, พเลน มณินามกํ;
ปาสาทํ กาตุมารทฺโธ, จุโต วสฺสมฺหิ อฏฺฐเมฯ
[52]
ปญฺเจเต วสุธาธิปา วสุมหิํ เอกาตปตฺตงฺกิตํ;
ภุตฺวา นิคฺคหสงฺคเหหิ สกลํ โลกํ วเส วตฺติย;
ยา ตา มจฺจุวสํ สปุตฺตวณิตา สามจฺจมิตฺตานุคา;
อิจฺเจวํ สตตํ สรนฺตุ สุชนา หาตุํ ปมาทํ มทํฯ
สุชนปฺปสาทสํเวคตฺถาย กเต มหาวํเส
ปญฺจราชโก นาม
เอกปญฺญาสติโม ปริจฺเฉโทฯ
ทฺวิปญฺญาสติม ปริจฺเฉท
ติราชโกนาม
[1]
ตโต ลงฺกาภิเสกํ โส, ปตฺวา เสโน กมาคตํ;
มหินฺทสฺสาทิปาทสฺส, ยุวราชปทํ อทาฯ
[2]
ปญฺโญ มหากวี พฺยตฺโต, มชฺฌตฺโต มิตฺตสตฺตุสุ;
ยุตฺโต ทยาย เมตฺตาย, ราชา โส สพฺพทา อหุฯ
[3]
กาลํ เทโว’นติกฺกมฺม, สมฺมา ธาราภิวสฺสติ;
รฏฺเฐ ตสฺมิํ วสนฺตา’สุํ, สุขิตา นิพฺภยา สทาฯ
[4]
สุตฺตนฺตํ โลหปาสาเท, นิสินฺโน วณฺณยี ตทา;
นิกายตฺตยวาสีหิ, ราชา โส ปริวาริโตฯ
[5]
ทาฐธาตุกรณฺฑํ โส, นานารตนภูสิตํ;
อกา จตุวิหาเรสุ, ธาตุปูชา จ’เนกธาฯ
[6]
ปริเวณํ สิตฺถคามํ, กาเรตฺวา วุตฺถมตฺตนา;
โลกํ ปุตฺตํว ปาเลตฺวา, ติวสฺเสน ทิวงฺคโตฯ
[7]
ยุวราชา มหินฺโท โส, ราชาสิ ตทนนฺตรํ;
มหาปุญฺโญ มหาเตโช, มหาเสโน มหายโสฯ
[8]
เอกจฺฉตฺตํ อกา ลงฺกํ, ฆาเตตฺวา โจรุปทฺทวํ;
อกํสุ ตมุปฏฺฐานํ, นิจฺจมณฺฑลนายกํฯ
[9]
วิชฺชมาเนปิ ลงฺกายํ, ขตฺติยานํ นราธิโป;
กาลิงฺคจกฺกวตฺติสฺส, วํเส ชาตํ กุมาริกํฯ
[10]
อาณาเปตฺวาน ตํ อคฺค-มเหสิํ อตฺตโน อกา;
ตสฺสา ปุตฺตา ทุเว ชาตา, ธีตา เอกา มโนรมาฯ
[11]
อาทิปาเท อกา ปุตฺเต, ธีตรํ โจปราชินิํ;
อิติ สีหฬวํสญฺจ, ปฏฺฐเปสิ สภูปติฯ
[12]
พลกายํ อิมํ เทสํ, มทฺทนตฺถาย วลฺลโภ;
เปเสสิ นาคทีปํ โส, สุตฺวา ตํ ภูปติ อิธฯ
[13]